Вазирлар Маҳкамасининг 27.11.2017 йилдаги 944-сон қарори билан Фуқароларнинг ўзини ўзи бошқариш органларида меҳнат муносабатларини тартибга солиш тўғрисидаги низом тасдиқланди.
Меҳнатга ҳақ тўлаш
Фуқаролар йиғинининг штатдаги ходимларига меҳнатга ҳақ тўлашнинг Ягона тариф сеткаси асосида лавозим маоши шаклида ҳақ тўланади. Разрядлар Вазирлар Маҳкамасининг 2017 йил 17 июлдаги 500-сон қарори билан белгиланади.
Бюджетдан ташқари манбалар ҳисобидан мукофотлар ва қўшимча ҳақ:
- оқсоқолларга — тегишли туманлар (шаҳарлар) ҳокимлари қарори билан;
- бошқа ходимларга — худди шу тартибда, бироқ оқсоқол тақдимномаси асосида тўланади.
Эслатиб ўтамиз,фуқаролар йиғинининг штатдаги лавозимлари қаторига қуйидагилар киради:
- фуқаролар йиғини раиси;
- фуқаролар йиғини масъул котиби;
- «Маҳалла посбони» жамоат тузилмаси раҳбари;
- фуқаролар йиғинининг диний маърифат ва маънавий-ахлоқий тарбия масалалари бўйича маслаҳатчиси;
- ҳарбий ҳисобга олиш бўйича мутахассис.
Иш тартиби
Фуқаролар йиғинларида 40 соатлик ва 6 кунлик иш ҳафтаси белгиланади. Ходимлар иш куни 7-00 дан 22-00 гача тақсимланадиган мослашувчан иш вақти тартибига эга бўлади. Фуқаролар йиғини раиси (оқсоқоли) ва ходимларининг иш жадвали уларнинг бевосита фуқаролар йиғини биносида бўлиш вақти кўрсатилган ҳолда умумий кўринадиган жойда осиб қўйилади.
Фуқаролар йиғини ходимларига ҳар йили бериладиган ҳақ тўланадиган меҳнат таътилининг давомийлиги - 24 иш куни.
Ҳужжат Қонун ҳужжатлари маълумотлари миллий базасида расман эълон қилинган ва 28.11.2017 йилда кучга кирди.
Мазкур ҳужжатнинг матни билан, у билан боғланган бошқа қонун ҳужжатларига шарҳлар ва ҳаволалар билан «Ўзбекистон Республикаси қонунчилиги» ахборот-қидирув тизимида танишиш мумкин.
Ленара Хикматова.
