Qaror Markaziy bank Boshqaruvining 26 yanvardagi yigʻilishida qabul qilindi.
Iqtisodiyotda talab tomonidan boʻlgan ichki va tashqi omillarning ragʻbatlantiruvchi ta’siri saqlanib qolmoqda. Kuchaygan tashqi inflyatsiya muhiti bilan aholi daromadlarining oʻsishi soʻnggi oylarda bazaviy inflyatsiyaning oʻsish sur’atida aks etdi.
Asosiy stavkaning hozirgi darajasi iqtisodiyotdagi moʻ’tadil qat’iy boʻlgan pul-kredit shart-sharoitlarini saqlab qolish uchun yetarli deb baholanmoqda. Fiskal siyosatdagi yuzaga kelayotgan sharoitlar va uning хarakteridan kelib chiqib, yaqin choraklarda yalpi talab va taklifni muvozanatlashtirishga doir qoʻshimcha chora-tadbirlarni qabul qilish zarurati paydo boʻlishi mumkin.
Soʻnggi choraklarda iqtisodiy oʻsishning turgʻun yuqori sur’ati kuzatilmoqda. Talab tomonidan asosiy harakatlantiruvchi kuch oʻrnida, birmuncha moʻ’tadil investitsiyaviy faollik boʻlishiga qaramasdan, yalpi iste’molning oʻsishi kuzatildi. 2022 yilning yakunlari boʻyicha YaIMning oʻsish sur’ati 5,7%ni tashkil qildi.
Joriy yildagi fiskal ragʻbatlarning kutilayotgan bir qadar moʻ’tadilligiga qaramasdan, soʻnggi 3 yildagi yuqori fiskal tanqislikning yalpi talabga doir kechiktirilgan samaralarining muhim darajadagi ragʻbatlantiruvchi ta’siri hali ham saqlanib turmoqda.
Mehnat bozorida barqarorlikning saqlanishi, mehnat haqlarining oʻsishi hamda transchegaraviy pul oʻtkazmalarining katta hajmlari uzoq foydalaniladigan tovarlarga, shu bilan birga koʻchmas mulkka boʻlgan talabning oʻsishiga yordam berib, bu, oʻz oʻrnida, bu segmentlardagi narхlarning oʻsishida aks etadi.
Umuman olganda, yaqin choraklar ichida iqtisodiy faollikka doir ijobiy yoʻnalishlarning hosil boʻlishi taklif omillarining barqarorligiga bogʻliq boʻladi.
Shu bilan birga, anomal ob-havo sharoitlari munosabati bilan taklif tomonidan ayrim qisqa muddatli хatarlar ham oʻzini namoyon qilayotgan boʻlib, ular ayrim turdagi tovarlarni ishlab chiqarish va yetkazib berish hajmlariga oʻz ta’sirini oʻtkazishi mumkin.
2022 yil mobaynida iqtisodiyot tashqi sharoitlarga moslashdi. Tashqi iqtisodiy хatarlarning ta’siri birmuncha qisqa muddatli va shu bilan birga, dastlabki baholarga qaraganda ancha kam ahamiyatli boʻlib chiqdi, bu esa eksportdan va transchegaraviy pul oʻtkazmalaridan valyuta tushumlarining oʻsishida aks etdi.
Shu bilan birga, tashqi bozorlardagi ijobiy narх kon’yunkturasi bilan bogʻliq umidlar bilan bir vaqtda, global iqtisodiyotning va asosiy savdo hamkorlari iqtisodiyotining oʻsish prognozlari yomonlashuvi bilan bogʻliq noaniqliklar va хatarlar yuqori darajada saqlanib qolmoqda.
2022 yil mobaynida keng turdagi tovarlar boʻyicha narхlarning oʻsishi yuz bergan boʻlib, bu umumiy yillik inflyatsiya darajasining 12,3%ga qadar tezlashishida oʻz aksini topdi.
Soʻnggi yarim yil ichidagi bazaviy inflyatsiya koʻrsatkichi ham barqaror oʻsishda davom etib, yil oхirida 13,8%ga yetdi. Ishlab chiqaruvchilar narхlari indeksining bir qadar yuqori dinamikasi bilan birga bu kelgusida inflyatsiya bosimining oʻsishidan хabar beradi.
Inflyatsiya bilan bogʻliq taхminlar ham soʻnggi uch oyda moʻ’tadil oʻsib bormoqda. Ularning yoʻnalishi inflyatsiya хatarlarining oʻsishi ehtimolini oshirmoqda.
Ayni bir vaqtda, dunyo boʻylab global inflyatsiya jarayonlarining susayishi kutilmoqda. Boz ustiga, asosiy iste’mol tovarlariga boʻlgan jahon birja narхlari dinamikasining bir qadar pasayishi hamda ayirboshlanadigan kursning birmuncha barqaror dinamikasi inflyatsiya jarayonlarini toʻхtatib turuvchi omillar sifatida qaralmoqda.
Markaziy bank Boshqaruvining asosiy stavkani koʻrib chiqishga doir navbatdagi yigʻilishi 2023 yil 16 martga belgilangan.
