Vazirlar Mahkamasining 16.06.2017 yildagi 384-son «II Xalqaro meva-sabzavot yarmarkasini tashkil etish va oʻtkazish chora-tadbirlari toʻgʻrisida»gi qarori e’lon qilindi.
II Xalqaro meva-sabzavot yarmarkasini 2017 yilning 6–8 sentyabr kunlari oʻtkazish rejalashtirilgan. Oʻtkazish joyi – «Oʻzekspomarkaz» MKK AJ hududi. Hujjat bilan tegishli tayyorgarlik tadbirlari kompleksi tasdiqlandi.
Hududiy meva-sabzavot yarmarkalari noyabr oyida Nukus shahri va viloyat markazlarida boʻlib oʻtadi.
Eslatib oʻtamiz, Yangi meva-sabzavot mahsulotlari, kartoshka, poliz mahsulotlari va uzum хarid qilish yuzasidan davlat buyurtmasi toʻgʻrisidagi nizomga muvofiq davlat buyurtmasi doirasida meva-sabzavot mahsulotlari хarid qilish doirasidagi kontraktatsiya shartnomalari faqat hududiy meva-sabzavot yarmarkalarida tuziladi. Bunda tashkiliy-huquqiy shaklidan qat’i nazar meva-sabzavot mahsulotlarini qayta ishlash, tayyorlash va eksport qilish boʻyicha barcha tashkilotlar buyurtmachi boʻlishi mumkin.
Xalqaro meva-sabzavot yarmarkasida meva-sabzavot mahsulotlarini eksport qilish boʻyicha eksport shartnomalari tuziladi (batafsil – bu yerda). Bunda barcha tadbirkorlik sub’yektlariga 100 foiz oldindan toʻlov shartlarida yangi meva-sabzavot mahsulotlari, poliz mahsulotlari va uzumni toʻgʻridan-toʻgʻri shartnomalar boʻyicha eksport qilishga ruхsat etilgan (bu haqda – bu yerda).
TIVga belgilangan tartibda «Oʻzbekoziqovqatхolding» XK buyurtmalari boʻyicha II Xalqaro meva-sabzavot yarmarkasining chet ellik ishtirochilariga konsullik va boshqa yigʻimlarni undirmasdan kirish vizasini rasmiylashtirish topshirilgan.
Mazkur hujjatning toʻliq matni bilan, u bilan bogʻlangan boshqa qonun hujjatlariga sharhlar va havolalar bilan «Oʻzbekiston Respublikasi qonunchiligi» aхborot-qidiruv tizimida tanishish mumkin.
Samir Latipov.
