Вазирлар Маҳкамасининг 16.06.2017 йилдаги 384-сон «II Халқаро мева-сабзавот ярмаркасини ташкил этиш ва ўтказиш чора-тадбирлари тўғрисида»ги қарори эълон қилинди.
II Халқаро мева-сабзавот ярмаркасини 2017 йилнинг 6–8 сентябрь кунлари ўтказиш режалаштирилган. Ўтказиш жойи – «Ўзэкспомарказ» МКК АЖ ҳудуди. Ҳужжат билан тегишли тайёргарлик тадбирлари комплекси тасдиқланди.
Ҳудудий мева-сабзавот ярмаркалари ноябрь ойида Нукус шаҳри ва вилоят марказларида бўлиб ўтади.
Эслатиб ўтамиз, Янги мева-сабзавот маҳсулотлари, картошка, полиз маҳсулотлари ва узум харид қилиш юзасидан давлат буюртмаси тўғрисидаги низомга мувофиқ давлат буюртмаси доирасида мева-сабзавот маҳсулотлари харид қилиш доирасидаги контрактация шартномалари фақат ҳудудий мева-сабзавот ярмаркаларида тузилади. Бунда ташкилий-ҳуқуқий шаклидан қатъи назар мева-сабзавот маҳсулотларини қайта ишлаш, тайёрлаш ва экспорт қилиш бўйича барча ташкилотлар буюртмачи бўлиши мумкин.
Халқаро мева-сабзавот ярмаркасида мева-сабзавот маҳсулотларини экспорт қилиш бўйича экспорт шартномалари тузилади (батафсил – бу ерда). Бунда барча тадбиркорлик субъектларига 100 фоиз олдиндан тўлов шартларида янги мева-сабзавот маҳсулотлари, полиз маҳсулотлари ва узумни тўғридан-тўғри шартномалар бўйича экспорт қилишга рухсат этилган (бу ҳақда – бу ерда).
ТИВга белгиланган тартибда «Ўзбекозиқовқатхолдинг» ХК буюртмалари бўйича II Халқаро мева-сабзавот ярмаркасининг чет эллик иштирочиларига консуллик ва бошқа йиғимларни ундирмасдан кириш визасини расмийлаштириш топширилган.
Мазкур ҳужжатнинг тўлиқ матни билан, у билан боғланган бошқа қонун ҳужжатларига шарҳлар ва ҳаволалар билан «Ўзбекистон Республикаси қонунчилиги» ахборот-қидирув тизимида танишиш мумкин.
Самир Латипов.
