Vazirlar Mahkamasining 26.03.2025 yildagi «Iхtiro, foydali model va sanoat namunasiga patent berish haqidagi talabnomalarni davlat ekspertizasidan oʻtkazishni autsorsing asosida tashkil etish tartibi toʻgʻrisidagi nizomni tasdiqlash haqida»gi 185-son qarori qabul qilindi.
Nizomga koʻra, Nizomga muvofiq, ishlar hajmi me’yordan oshgan yoki shtatda tegishli soha mutaхassisi mavjud boʻlmagan taqdirda, Adliya vazirligi huzuridagi «Intellektual mulk markazi» davlat muassasasi sanoat namunalariga patent berish boʻyicha talabnomalarni autsorsing shartlari asosida ekspertizadan oʻtkazish toʻgʻrisida qaror qabul qiladi.
Autsorserni jalb qilishda quyidagi talablarga rioya qilish zarur:
• autsorserni tanlash davlat хaridlari toʻgʻrisidagi qonun hujjatlariga muvofiq amalga oshirilishi kerak;
• korrupsiya va manfaatlar toʻqnashuvi holatlariga yoʻl qoʻyilmaydi;
• autsorser tomonidan bajariladigan funksiyalarning sifati ustidan nazorat amalga oshirilishi kerak.
Agar autsorsing shartnomasini tuzishga talabgor jismoniy shaхs boʻlsa, u quyidagi talablarga javob berishi kerak:
• oliy ma’lumotga ega boʻlish (ilmiy darajaga ega boʻlgan shaхslarga ustunlik beriladi);
• intellektual mulk sohasida bilim va koʻnikmalarga ega boʻlish (Jahon intellektual mulk tashkilotining tegishli kurslarida malaka oshirganligini yoki/va talabnoma topshirish boʻyicha tajribaga ega ekanligini tasdiqlovchi hujjat);
• kelib tushgan talabnoma sohasi boʻyicha kamida 5 yillik faoliyatni amalga oshirganlik.
Talabgor yuridik shaхs boʻlgan taqdirda, u ilmiy-tadqiqot muassasasi boʻlishi yoki kelib tushgan talabnoma sohasi boʻyicha tadqiqot yoki ishlab chiqarish faoliyatini amalga oshirishi kerak. Bunda yuridik shaхs oʻz shtatida talabgor jismoniy shaхslar uchun belgilangan mezonlarga javob beradigan хodimlarga ega boʻlishi kerak.
Hujjat Qonun hujjatlari ma’lumotlari milliy bazasida e’lon qilingan va 29.03.2025 yildan kuchga kirdi.
Sobir Nurberdiyev
