Вазирлар Маҳкамасининг 26.03.2025 йилдаги «Ихтиро, фойдали модель ва саноат намунасига патент бериш ҳақидаги талабномаларни давлат экспертизасидан ўтказишни аутсорсинг асосида ташкил этиш тартиби тўғрисидаги низомни тасдиқлаш ҳақида»ги 185-сон қарори қабул қилинди.
Низомга кўра, Низомга мувофиқ, ишлар ҳажми меъёрдан ошган ёки штатда тегишли соҳа мутахассиси мавжуд бўлмаган тақдирда, Адлия вазирлиги ҳузуридаги «Интеллектуал мулк маркази» давлат муассасаси саноат намуналарига патент бериш бўйича талабномаларни аутсорсинг шартлари асосида экспертизадан ўтказиш тўғрисида қарор қабул қилади.
Аутсорсерни жалб қилишда қуйидаги талабларга риоя қилиш зарур:
• аутсорсерни танлаш давлат харидлари тўғрисидаги қонун ҳужжатларига мувофиқ амалга оширилиши керак;
• коррупция ва манфаатлар тўқнашуви ҳолатларига йўл қўйилмайди;
• аутсорсер томонидан бажариладиган функцияларнинг сифати устидан назорат амалга оширилиши керак.
Агар аутсорсинг шартномасини тузишга талабгор жисмоний шахс бўлса, у қуйидаги талабларга жавоб бериши керак:
• олий маълумотга эга бўлиш (илмий даражага эга бўлган шахсларга устунлик берилади);
• интеллектуал мулк соҳасида билим ва кўникмаларга эга бўлиш (Жаҳон интеллектуал мулк ташкилотининг тегишли курсларида малака оширганлигини ёки/ва талабнома топшириш бўйича тажрибага эга эканлигини тасдиқловчи ҳужжат);
• келиб тушган талабнома соҳаси бўйича камида 5 йиллик фаолиятни амалга оширганлик.
Талабгор юридик шахс бўлган тақдирда, у илмий-тадқиқот муассасаси бўлиши ёки келиб тушган талабнома соҳаси бўйича тадқиқот ёки ишлаб чиқариш фаолиятини амалга ошириши керак. Бунда юридик шахс ўз штатида талабгор жисмоний шахслар учун белгиланган мезонларга жавоб берадиган ходимларга эга бўлиши керак.
Ҳужжат Қонун ҳужжатлари маълумотлари миллий базасида эълон қилинган ва 29.03.2025 йилдан кучга кирди.
Собир Нурбердиев
