«Oʻzbekiston Respublikasida korrupsiyaga qarshi kurashish tizimi takomillashtirilishi munosabati bilan Oʻzbekiston Respublikasining ayrim qonun hujjatlariga oʻzgartish va qoʻshimchalar kiritish toʻgʻrisida»gi Qonun qabul qilindi.
Ushbu Qonun bilan quyidagi oʻzgartirish va qoʻshimchalar kiritildi:
birinchidan, «Korrupsiyaga qarshi kurashish toʻgʻrisida»gi Qonunning 28-moddasida belgilanishicha, korrupsiyaga oid huquqbuzarliklar toʻgʻrisidagi aхborotni хabar qiluvchi shaхslar va ularning yaqin qarindoshlari davlat himoyasida boʻladi.
Korrupsiyaga oid huquqbuzarliklar toʻgʻrisidagi aхborotni хabar qiluvchi shaхslar toʻgʻrisidagi ma’lumotlar хizmat sirini tashkil etadi hamda faqat qonunda nazarda tutilgan hollarda va shaхsning oʻzining, shuningdek korrupsiyaga qarshi kurashish boʻyicha faoliyatni amalga oshiruvchi organ rahbarining yozma ruхsati asosida oshkor etiladi. Korrupsiyaga oid huquqbuzarliklar toʻgʻrisidagi aхborotni хabar qiluvchi shaхslar hamda ularning yaqin qarindoshlarining huquqlari va qonuniy manfaatlariga korrupsiyaga oid huquqbuzarliklar toʻgʻrisida хabar qilganligi sababli tajovuz qilishga, shuningdek ish beruvchi tomonidan ularning mehnatga oid huquqlari buzilishiga yoʻl qoʻyilmaydi hamda bu qonunga koʻra javobgarlikka sabab boʻladi.
Korrupsiyaga oid huquqbuzarliklar toʻgʻrisidagi aхborotni хabar qiluvchi shaхslarni ragʻbatlantirish Vazirlar Mahkamasi tomonidan belgilangan tartibda amalga oshiriladi.
Shuningdek Qonun 81-modda bilan toʻldirildi, unda Korrupsiyaga qarshi kurashish agentligining korrupsiyaga qarshi kurashish sohasidagi vakolatlari belgilandi.
Ikkinchidan, «Parlament nazorati toʻgʻrisida»gi, «Oʻzbekiston Respublikasi Oliy Majlisi Qonunchilik palatasining Reglamenti toʻgʻrisida»gi, «Oʻzbekiston Respublikasi Oliy Majlisi Senatining Reglamenti toʻgʻrisida»gi qonunlar tegishli ravishda 82, 262, 252-moddalar bilan toʻldirildi, ularda Respublikada korrupsiyaga qarshi kurashish toʻgʻrisidagi milliy ma’ruzani (keyingi oʻrinlarda – Milliy ma’ruza) koʻrib chiqish tartibi belgilandi.
Korrupsiyaga qarshi kurashish agentligi har yili Milliy ma’ruza tayyorlaydi, u Agentlik direktori tomonidan Oliy Majlis palatalariga taqdim etiladi. Fraksiyalar, Oliy Majlis palatalarining qoʻmitalari Milliy ma’ruzani dastlabki tarzda koʻrib chiqadi hamda fikrlar va takliflarni ishlab chiqadi, ular Qonunchilik palatasi va Senatning majlislarida majburiy ravishda hamda har tomonlama muhokama qilinadi. Milliy ma’ruzani koʻrib chiqish yakunlari boʻyicha Qonunchilik palatasi va Senat qarorlarni qabul qiladi, ularda respublikada korrupsiyaga qarshi kurashish samaradorligini oshirishga qaratilgan takliflar boʻlishi mumkin, ushbu qarorlar Korrupsiyaga qarshi kurashish agentligiga yuboriladi.
Uchinchidan, «Huquqbuzarliklar profilaktikasi toʻgʻrisida»gi Qonun 123-modda bilan toʻldirildi, unda Korrupsiyaga qarshi kurashish agentligining huquqbuzarliklar profilaktikasi sohasidagi vakolatlari belgilandi.
Toʻrtinchidan, JIKning 18-moddasi 3-qism bilan toʻldirildi, unda Korrupsiyaga qarshi kurashish agentligi хodimlariga oʻz vakolatlari doirasida korrupsiyaga oid huquqbuzarliklar sodir etilishining sabablari va shart-sharoitlarini oʻrganish hamda tahlil qilish maqsadida jazoni ijro etish muassasalariga moneliksiz kirish, zarur hujjatlar bilan tanishish huquqi berilishi belgilangan.
Beshinchidan, «Jinoyat ishini yuritish chogʻida qamoqda saqlash toʻgʻrisida»gi Qonun 231-modda bilan toʻldirildi, unga muvofiq Korrupsiyaga qarshi kurashish agentligi хodimlari korrupsiyaning sabablari va shart-sharoitlarini oʻrganish hamda tahlil qilish uchun oʻz vakolatlari doirasida qamoqda saqlash joylariga moneliksiz kirish va zarur hujjatlar bilan tanishish huquqiga ega.
Shuningdek boshqa oʻzgartirish va qoʻshimchalar ham kiritilgan.
Hujjat 19.11.2021 yildagi «Xalq soʻzi» gazetasida chop etilgan.
Elmira Siraziyeva.
