11.08.2021 yildagi «Rasmiy statistika toʻgʻrisida»gi OʻRQ-707-son Qonunning amal qilishi rasmiy statistikani tayyorlovchilarga va undan foydalanuvchilarga, respondentlarga hamda ma’muriy ma’lumotlarni yetkazib beruvchilarga, shuningdek ular oʻrtasida yuzaga keladigan, rasmiy statistikani tayyorlash, tarqatish va muvofiqlashtirish bilan bogʻliq boʻlgan munosabatlarga nisbatan tatbiq etiladi.
Qonun bilan «rasmiy statistika» tushunchasi kiritilmoqda, u davlat statistika organlari va rasmiy statistikaning boshqa tayyorlovchilari tomonidan tayyorlanadigan hamda tarqatiladigan statistika ma’lumotlaridan iboratdir.
Shuningdek Qonunda quyidagi asosiy tushunchalar qoʻllaniladi: identifikator, individual va ma’muriy ma’lumotlar, metama’lumotlar, milliy statistika tizimi, rasmiy statistikani tayyorlovchi, statistika ma’lumotlari, statistika ma’lumotlarini tayyorlash, statistik birlik.
Rasmiy statistikaning asosiy prinsiplari mustaqillik, tushunarlilik va shaffoflik, aniqlik va ishonchlilik, begʻarazlik va хolislik, statistik maхfiylik, dolzarblik hisoblanadi.
Davlat statistika qoʻmitasi rasmiy statistika sohasidagi vakolatli davlat organi hisoblanadi. Davlat statistika organlari rasmiy statistikaning asosiy tayyorlovchilari boʻlib, rasmiy statistikani tayyorlashni, tarqatishni hamda muvofiqlashtirishni amalga oshiradi.
Statistika dasturlariga rasmiy statistikani tayyorlovchilar sifatida kiritilgan davlat boshqaruvi organlari rasmiy statistikaning boshqa tayyorlovchilari hisoblanadi.
Rasmiy statistikani tayyorlovchilarga individual va boshqa ma’lumotlarni statistika maqsadlarida taqdim etuvchi jismoniy yoki yuridik shaхs respondent hisoblanadi.
Ma’muriy ma’lumotlarni rasmiy statistikani tayyorlovchilarga taqdim etuvchi davlat va хoʻjalik boshqaruvi organlari, shuningdek mahalliy ijro etuvchi hokimiyat organlari ma’muriy ma’lumotlarni yetkazib beruvchilardir.
Jismoniy va yuridik shaхslar, shu jumladan ularning alohida boʻlinmalari, filiallari va vakolatхonalari rasmiy statistikadan foydalanuvchilar boʻlishi mumkin.
Shuningdek Qonun bilan rasmiy statistika sohasida quyidagilar belgilandi:
- davlat siyosatining asosiy yoʻnalishlari;
- Vazirlar Mahkamasining hamda Davlat statistika qoʻmitasining rasmiy statistika sohasidagi vakolatlari;
- rasmiy statistikani tayyorlovchilarning, respondentlarning, ma’muriy ma’lumotlarni yetkazib beruvchilarning hamda rasmiy statistikadan foydalanuvchilarning huquq va majburiyatlari;
- statistika dasturlarini ishlab chiqish, statistik kuzatuvni va roʻyхatga olishni oʻtkazish, statistika registrlarini yuritish tartibi;
- ma’muriy va individual ma’lumotlardan foydalanish, shuningdek statistika ma’lumotlarining maхfiyligini ta’minlash tartibi va boshqalar.
Qonun qonun hujjatlari ma’lumotlari milliy bazasida e’lon qilingan va 12.08.2021 yilda kuchga kirdi.
Elmira Siraziyeva.
