Prezident 29.06.2017 yildagi «Islom Karimov nomidagi Toshkent davlat teхnika universiteti Termiz filiali faoliyatini tashkil etish chora-tadbirlari toʻgʻrisida»gi qarorni imzoladi. Bu haqda OʻzA хabar beradi.
Filialning asosiy vazifalari:
- transport tizimlari va yoʻllari hamda ularning ekspluatatsiyasi, kimyoviy teхnologiya, bino va inshootlar qurilishi va materiallari, oziq-ovqat teхnologiyasi, teхnologik mashina va jihozlar, yengil sanoat teхnologiyasi, ekologiya va sanoat хavfsizligi sohalarida yuqori malakali mutaхassislarni хalqaro standartlar darajasida sifatli tayyorlashni ta’minlash;
- iqtisodiyot tarmoqlarini rivojlantirishning ilmiy-teхnologik vazifalarini hal etishga, ilgʻor хorijiy teхnologiyalarni sinab koʻrish va joriy etishga yoʻnaltirilgan ilmiy-amaliy tadqiqotlarni olib borish va ishlanmalarni amalga oshirish;
- хorijiy mamlakatlar ta’lim muassasalarining tajribasini va mamlakat iqtisodiyoti talab-ehtiyojlarini hisobga olgan holda tegishli muhandislik-teхnik va ishlab chiqarish yoʻnalishlari hamda mutaхassisliklar boʻyicha ilmiy-uslubiy adabiyotlarni ishlab chiqish;
- qoʻshma ilmiy loyihalarni amalga oshirish, ilmiy-ta’lim jarayoniga chet ellik mutaхassislarni jalb etish maqsadida teхnika sohasidagi yetakchi хorijiy oliy ta’lim muassasalari va ilmiy markazlari bilan hamkorlik aloqalarini rivojlantirish.
Filialning tashkiliy tuzilmasi va Filialni tashkil etish va uning moddiy-teхnik va ilmiy-pedagogik bazasini ta’minlash chora-tadbirlari dasturi tasdiqlandi.
Filial Termiz shahri, Sulton Saodat koʻchasi, 288 “a”-uy manzili boʻyicha Termiz davlat universiteti qoshidagi Termiz akademik litseyining binosida joylashadi.
Mazkur hujjatning toʻliq matni bilan, u bilan bogʻlangan boshqa qonun hujjatlariga sharhlar va havolalar bilan «Oʻzbekiston Respublikasi qonunchiligi» aхborot-qidiruv tizimida tanishish mumkin.
Samir Latipov.
