Vazirlar Mahkamasining 24.11.2021 yildagi “Toshkent shahrida Italiyaning Piza universiteti filialini tashkil etish toʻgʻrisida”gi 710-son qarori qabul qilindi.
OTM geologiya boʻyicha yuqori malakali mutaхassislarni tayyorlaydi va ushbu sohada tadqiqotlar oʻtkazadi.
Hujjat bilan quyidagilar tasdiqlandi:
- Filial vasiylik kengashi tarkibi;
- Filialni tashkil etish boʻyicha ishchi guruh tarkibi.
Filialda ta’lim kunduzgi ta’lim shaklida oʻzbek, ingliz va rus tillarida toʻlov-kontrakt asosida 2022/2023 oʻquv yilidan boshlanadi. Filial bitiruvchilariga Piza universiteti diplomi beriladi. Qabul parametrlari respublikada mutaхassislarga boʻlgan ehtiyojni inobatga olgan holda belgilanadi.
2022 yil 1 iyunga qadar bino va inshootlar, oʻquv-laboratoriya korpusi va sport inshootlari quriladi, talabalar va oʻqituvchilar turar joylari tayyorlanadi.
Hujjat Qonun hujjatlari ma’lumotlari milliy bazasida e’lon qilingan va 24.11.2021 yildan kuchga kirdi.
Lola Abduazimova.
