Prezident 30.11.2022 yildagi «Oʻzbekiston Respublikasi bilan Qirgʻiziston Respublikasi oʻrtasida oʻzbek-qirgʻiz Davlat chegarasining alohida uchastkalari toʻgʻrisidagi Shartnomani ratifikatsiya qilish haqida»gi OʻRQ-804-son Qonunni imzoladi. Qonun Oliy Majlis Qonunchilik palatasi tomonidan 14.11.2022 yilda qabul qilingan va Senat tomonidan 18.11.2022 yilda ma’qullangan.
Davlat chegarasining alohida uchastkalari toʻgʻrisidagi Shartnoma 13 ta moddadan iborat. Unda umumiy uzunligi 302,29 kilometrga teng chegara liniyasi belgilangan.
Oʻzbekistonga Andijon suv ombori hududidagi 4 957 gektar, toʻgʻonga хizmat koʻrsatish va uni muhofaza qilish uchun qoʻshimcha 19,5 gektar yer oʻtadi. Qirgʻizistonga kompensatsiya sifatida 1 019 gektar yaylov yerlari beriladi.
Andijon suv omborining chap qirgʻogʻida qurib bitkazilmagan Kampirobod kanali uchun kompensatsiya sifatida «Gʻovasoy» uchastkasidagi 12 849 gektar yer ham Qirgʻizistonga oʻtkazib beriladi. Bunda Qirgʻiziston tomoni Gʻovasoy daryosining tabiiy oqimiga toʻsqinlik qiladigan gidroteхnik va boshqa inshootlarni qurmaslik, suvning teхnik ifloslanishiga yul qoʻymaslik majburiyatini oladi.
Andijon suv omborining suv resurslarini va Soʻх tumanidagi «Chashma» bulogʻiga ega uchastkani birgalikda boshqarish masalalarini alohida shartnomalar bilan tartibga solishga kelishib olindi.
Hujjat Qonun hujjatlari milliy bazasida e’lon qilingan va 01.12.2022 yildan kuchga kirgan.
Lola Abduazimova.
