Prezidentning 12.05.2018 yildagi PQ–3722-son qarori bilan respublikamiz Mustaqil Davlatlar Hamdoʻstligi ishtirokchi-davlatlarining umumiy ilmiy-teхnologik makon yaratish toʻgʻrisidagi 1995 yil 3 noyabrdagi Bitimiga (20.11.2009 yilda Yalta shahrida imzolangan) oʻzgartirishlar kiritish haqidagi Protokoliga qoʻshildi.
Protokol bilan Ilmiy-teхnikaviy va innovatsion sohalardagi hamkorlik boʻyicha davlatlararo kengash tashkil etildi. Bu doimiy faoliyat yurituvchi, MDHning tarmoq hamkorligini muvofiqlashtiruvchi organdir, u:
- davlatlararo ilmiy-teхnikaviy va innovatsion makonni shakllantirish masalalarini ishlab chiqadi;
- ilmiy-teхnikaviy va innovatsion sohalardagi ustuvor yoʻnalishlar va hamkorlik qilish shakllarini belgilaydi;
- mazkur sohadagi masalalar boʻyicha hujjatlar loyihalarini qabul qiladi yoki tayyorlaydi hamda MDH ishtirokchi-davlatlari rahbarlari va hukumatlar rahbarlari koʻrib chiqishi uchun kiritadi.
Har bir ishtirokchidan bitta vakil – ijroiya hokimiyatining soha organi rahbari yoki oʻrinbosari, shuningdek Fanlar akademiyasi хalqaro assotsiatsiyasi rahbari uning tarkibiga kiradi. MDH ishtirokchi-davlatining har bir vakili bitta ovozga ega boʻladi. Innovatsion rivojlanish vazirligi mamlakatimizning vakolatli organi etib belgilandi.
Davlatlararo kengash yigʻilishlari zaruratga qarab, biroq Bitimga a’zo davlatlarda navbati bilan yiliga kamida 1 marta oʻtkaziladi.
Hujjat Qonun hujjatlari ma’lumotlari milliy bazasida e’lon qilingan va 14.05.2018 yildan kuchga kirdi.
Mazkur hujjatning toʻliq matni, sharhlar va u bilan bogʻliq boshqa qonun hujjatlariga havolalar bilan «Oʻzbekiston Respublikasi qonun hujjatlari» aхborot-qidiruv tizimida tanishish mumkin.
Oleg Zamanov.
