24 апрель куни Қонунчилик палатасида Меҳнат ва ижтимоий масалалар қўмитаси ташаббуси билан «Аҳолини рўйхатга олиш тўғрисида»ги қонун лойиҳаси муҳокамасига бағишланган давра суҳбати ўтказилди.
Аҳоли ва унинг фаровонлиги тўғрисидаги ишончли ахборотлар давлатнинг узоқ муддатли прогнозлари ва ҳудудларни ижтимоий-иқтисодий ривожлантириш мақсадли дастурларини ишлаб чиқишда муҳим асос ҳисобланади.
Мазкур маълумотлар асосида аҳолининг бандлигини таъминлаш, янги иш ўринлари яратиш, меҳнат ресурслари жойлашуви, улардан фойдаланиш жараёнларини ўрганиш, илмий тадқиқотлар олиб бориш бўйича дастурлар шакллантирилади.
Қонун лойиҳаси Президентнинг 5.02.2019 йилдаги «Ўзбекистон Республикасида 2022 йилда аҳолини рўйхатга олишни ўтказиш концепциясини тасдиқлаш тўғрисида» ПФ-5655-сон Фармонига биноан ишлаб чиқилган (ҳужжат шарҳи – бу ерда).
Лойиҳа аҳолини рўйхатга олишнинг асосий принциплари, аҳолини рўйхатга олиш иштирокчиларининг ҳуқуқ ва мажбуриятлари, ушбу жараёнга тайёргарлик кўриш ва уни ўтказувчи давлат органларини белгилайди. Унда аҳолини рўйхатга олиш дастурини шакллантириш, уни ўтказиш тартиби ва даври, маълумотларнинг хавфсизлигини таъминлаш, жараённи молиявий ва моддий-техник таъминлаш каби масалалар ўз аксини топган.
Олий Мажлис Қонунчилик палатаси
Матбуот хизмати материаллари асосида.
