Тошкентда онлайн-режимда ишлайдиган назорат-касса машиналаридан фойдаланиладиган, тадбиркорлар учун пилот лойиҳа ишга туширилди. Пойтахтимизда чакана савдо билан шуғулланувчи юридик шахслар лойиҳада иштирок этишлари мумкин.
Пилот лойиҳа ўтказиладиган даврда 500 та тадбиркорга онлайн-режимда ишлайдиган, операторлар фискал маълумотлар бериш хизматларини кўрсатадиган ва техник кўмак билан таъминлайдиган назорат-касса аппаратлари бепул берилади.
Лойиҳада иштирок этиш учун onlinekassa.uz порталида рўйхатдан ўтиш ва буюртма қолдириш зарур бўлади.
Эксперимент 2018 йил 1 июлгача ўтказилади, тизимга уланганлар сонини 1000 тагача етказиш режалаштирилмоқда. Кейинчалик ушбу тажриба бутун мамлакат бўйлаб тарқатилиши мўлжалланмоқда.
Солиқ қўмитаси вакилларининг қайд этишича, тизимнинг жорий этилиши тадбиркорлик субъектларининг нақд пул тушумлари билан боғлиқ фаолиятига аралашув ҳоллари қисқаришига имкон беради.
Шунингдек онлайн назорат-касса машиналари минтақалар кесимида айрим турдаги маҳсулотларнинг нархларини, уларни сотиш ҳажмларини таҳлил қилиш, шунингдек нархлар сунъий ўсиши ёки пасайиши сабабларини ўрганиш имконини беради.
