Ташқи иқтисодий фаолиятни янада тартибга солишга доир чора-тадбирлар лойиҳаси ҚҲТБТ порталида жойлаштирилган.
Миллий ишлаб чиқарувчилар ва иқтисодиётнинг таъсирчан секторларига салбий таъсирини йўқотиш мақсадида божхона божлари ставкаларини мақбуллаштириш ишлаб чиқилган ҳужжатнинг устувор йўналишларидан бири ҳисобланади. Шу муносабат билан олиб кирилаётган акциз тўланадиган товарларга импорт божхона божлари ва акциз солиғининг янги ставкаларини тасдиқлаш таклиф этилмоқда. Лойиҳага илова қилинаётган ставкалар билан бу ерда танишиб чиқиш мумкин.
Маълумот учун: мамлакатимизга олиб кирилаётган акциз тўланадиган товарларга импорт божхона божлари ва акциз солиғининг амалдаги ставкалари 2017 йил 1 октябрдан қўлланмоқда (акциз солиғининг битта ставкаси 2018 йилдан жорий этилди).
Шу билан бир қаторда мамлакатимизнинг ЖСТга аъзо бўлиши доирасида кенг миқёсдаги норма яратиш ишларини бошлаш кўзланмоқда. Хусусан, қуйидаги ҳужжатларни ишлаб чиқиш режалаштирилмоқда:
- Субсидиялар ва компенсация чораларини қўллаш соҳасидаги низом. Бунда савдо шартларига таъсир этишига ҳамда ЖСТнинг Субсидиялар ва компенсация чоралари бўйича битими доирасида қўллаш мумкинлигига қараб субсидияларни белгилаш, уларни таснифлашга алоҳида эътибор берилади;
- Халқаро стандартларга мувофиқ Интеллектуал мулк ҳуқуқларини ҳуқуқбузарликлардан ҳимояловчи юқори стандартни таъминлаш чора-тадбирлари режаси.
- Қабул қилинган ЖСТ нормалари ва қоидаларига мувофиқ янги таҳрирдаги «Ташқи иқтисодий фаолият тўғрисида»ги Қонун.
- Ўзбекистон ҳудудида импорт операцияларини амалга оширишда санитария-карантин, фитосанитария назорати ва ветеринария назоратини амалга оширишга доир чора-тадбирларни назарда тутувчи Нотариф тартибга солиш тўғрисидаги ҳужжат.
Лойиҳа ўзгартирилиши, унга қўшимча киритилиши ёки рад этилиши мумкин.
Олег Заманов.
