«Озиқ-овқат хавфсизлиги тўғрисида»ги қонун лойиҳаси ҚҲТБТ порталида эълон қилинди.
Маълумот учун: қонун лойиҳаси ишлаб чиқилиши Президентнинг 16.01.2018 йилдаги «Мамлакатнинг озиқ-овқат хавфсизлигини янада таъминлаш чора-тадбирлари тўғрисида»ги ПФ-5303-сон Фармони билан назарда тутилган.
Тақдим этилган қонун лойиҳасига мувофиқ Вазирлар Маҳкамаси ушбу соҳада қандай ваколатлар ва жавобгарликка эгалигини кўрсатиб ўтамиз.
Биринчидан, Вазирлар Маҳкамаси фуқароларимизнинг озиқ-овқат билан тўлақонли таъминланиш ҳуқуқларини кафолатлайди ва давлатимизнинг озиқ-овқат хавфсизлигини, шу жумладан:
- мамлакатимизда озиқ-овқат маҳсулотларининг зарур даражада ишлаб чиқарилишини;
- ички ва ташқи салбий омиллар таъсиридан қатъи назар, давлат озиқ-овқат захираси мавжуд бўлиши, янгиланиши ва тўлдирилишини;
- давлатимизда ишлаб чиқариладиган ва фуқароларга сотиладиган озиқ-овқат маҳсулотлари сифатининг давлат стандартлари тизими талабларига мувофиқлигини таъминлайди.
Иккинчидан, лойиҳа билан республикамизнинг озиқ-овқат мустақиллигини таъминлаш учун жавобгарлик Ҳукумат зиммасига юклатилган. Бир йилда мамлакатимизда ишлаб чиқарилган ҳаётий муҳим озиқ-овқат маҳсулотларининг ҳажми овқатланишнинг физиологик меъёрларига мувофиқ аҳоли йиллик эҳтиёжининг камида 80%ини ташкил этганда, у таъминланган деб ҳисобланади. Яъни таркиби ва ҳажмлари бўйича аҳоли озиқ-овқат рационининг асосини ташкил этувчи озиқ-овқат маҳсулотлари импортининг улуши 20%дан ошмаслиги керак.
Учинчидан, озиқ-овқат хавфсизлигини таъминлаш ва озиқ-овқат бозори устидан давлат назорати соҳасидаги тегишли назорат функциялари ҳам назарда тутилмоқда (қуйидаги жадвалга қаранг).
|
Озиқ-овқат хавфсизлигини таъминлаш юзасидан давлат назорати |
Озиқ-овқат бозори устидан давлат назорати
|
|
Қуйидагилар бўйича давлат кафолатларини бажаришга доир чора-тадбирлар мажмуи:
озиқ-овқат маҳсулотлари зарур ҳажмда ўзимизда ишлаб чиқарилишини таъминлаш;
озиқ-овқат товарлари импорти мослашувчан божхона-тариф тартибга солинишини таъминлаш;
давлат озиқ-овқат захирасини меъёрий даражада сақлаш;
ишлаб чиқарилаётган ва сотилаётган озиқ-овқат маҳсулотлари сифатининг давлат стандартлари тизими талабларига мувофиқлигини таъминлаш;
аҳолининг муносиб даражадаги ва соғлом турмуш тарзи сифатини таъминлаш учун етарли яшаш минимуми даражасини сақлаш. |
Қуйидагилардан иборат:
ишлаб чиқарилаётган озиқ-овқат, уларни етказиб бериш ва товар захиралари ҳисобини юритиш, шунингдек Ўзбекистон Республикаси минтақаларидаги озиқ-овқат бозори ҳолатини назорат қилиш;
озиқ-овқат улгуржи туркумларининг ишлаб чиқарилишидан ёки Ўзбекистон Республикаси ҳудудига олиб кирилишидан истеъмолчиларга етказиб берилишигача ҳаракатини назорат қилиш;
озиқ-овқат, шу жумладан импорт озиқ-овқат сифатининг экология ва санитария-эпидемиология талабларига мувофиқлигини сертификатлаш.
|
Бунда умуман мамлакат бўйича ва минтақалар кесимида озиқ-овқатнинг зарурий ва ҳақиқатда ишлаб чиқариш даражалари мувозанатига асосланиб, озиқ-овқат бозори устидан давлат назорати амалга оширилади. Вазирлар Маҳкамаси уни ҳам ҳар йили тузади.
Лойиҳа ўзгартирилиши, унга қўшимча киритилиши ёки рад этилиши мумкин.
Олег Заманов.
