Вазирлар Маҳкамасининг 21.09.2020 йилдаги “2020 йил учун Ўзбекистон Республикаси Давлат бюджетининг барқарорлигини таъминлаш ва харажатларини мақбуллаштириш чора-тадбирлари тўғрисида” 575-сон қарори билан бюджет ташкилотлари ходимлари учун айрим тўловларни тўхтатиб туриш муддатлари узайтирилди.
Ҳужжатга мувофиқ бюджет ташкилотларида ишлайдиган ходимларга Моддий рағбатлантириш махсус жамғармаси, Олий таълим муассасаларининг моддий рағбатлантириш жамғармаси ҳамда Директор жамғармаси (16.04.2020 йилдаги 232-сон ВМҚга асосан) маблағлари ҳисобига тўловлар ҳисобланишини тўхтатиб туриш 2020 йил 1 октябрдан 2021 йил 1 январга қадар узайтирилади. Тиббиёт, тиббий-ижтимоий муассасалари, меҳрибонлик уйларидан ҳамда меҳнатга ҳақ тўлашнинг 1-3 разрядлари қўлланиладиган ходимлар бундан мустасно.
Қарор билан Ўзбекистон Давлат бюджети, шунингдек Қорақалпоғистон Давлат бюджети, вилоятлар ва Тошкент шаҳар бюджетларида назарда тутилган республика ва маҳаллий бюджетларнинг мақбуллаштирилган харажатлари тасдиқланди.
Шунингдек, Ижтимоий ва ишлаб чиқариш инфратузилмасини ривожлантириш дастури доирасида бюджет тизими бюджетлари ҳисобига қуриш, реконструкция қилиш ва мукаммал таъмирлаш объектларининг лимитлари мақбуллаштирилди.
Инқирозга қарши курашиш жамғармаси маблағлари ҳисобига амалга оширилиши режалаштирилган 224,28 млрд сўм миқдоридаги қуйидаги харажатлар:
- 2020 йилга қўшимча ижтимоий ва инфратузилма лойиҳаларини амалга ошириш учун йўналтирилиши режалаштирилган маблағлар;
- ер майдонларини фойдаланишга киритиш учун туман маҳаллий бюджетларига ажратилган маблағлар;
- Фермер, деҳқон хўжаликлари ва томорқа ер эгаларини қўллаб-қувватлаш жамғармасига ўтказиладиган маблағлар мақбуллаштирилди.
Бунда Қорақалпоғистон бюджети, вилоятлар ва Тошкент шаҳар маҳаллий бюджетларининг тасдиқланган даромадлар прогнозининг бажарилмаслиги ҳисобига харажатларнинг қисми - республика бюджетига ўтказилади. Ушбу қарорга мувофиқ мақбуллаштирилган қолган маблағлар - келгусида уларни коронавирус инфекциясига қарши курашиш чора-тадбирларига йўналтириш учун Инқирозга қарши курашиш жамғармасига ўтказилади.
Ҳужжат Қонун ҳужжатлари маълумотлари миллий базасида эълон қилинган ва 22.09.2020 йилдан кучга кирди.
Лола Абдуазимова.
.png)
