Президент томонидан 22.11.2023 йилдаги «Фармацевтика фаолияти такомиллаштирилиши муносабати билан Ўзбекистон Республикасининг айрим қонун ҳужжатларига қўшимча ва ўзгартиришлар киритиш тўғрисида»ги ЎРҚ-879-сонли Қонун имзоланди.
Эндиликда соғлом жисмоний шахслар фармакологик воситанинг ёки дори воситасининг клиник тадқиқотида иштирок этишлари мумкин (илгари фақат беморларнинг иштироки белгиланган). Бунда:
- клиник тадқиқотда иштирок этиш шахснинг ёзма равишдаги розилиги билан ихтиёрий асосда амалга оширилади;
- клиник тадқиқот раҳбари клиник тадқиқот субъектига ушбу тадқиқот усулининг аҳамияти, мазкур тадқиқотнинг моҳияти ва эҳтимолда тутилган хавфи ҳақида батафсил тушунтириш бериши шарт;
- клиник тадқиқот субъекти тадқиқотнинг исталган босқичида унда иштирок этишни рад қилишга ҳақли;
- клиник тадқиқот вояга етмаган ёхуд муомалага лаёқатсиз субъект иштирокида ўтказилган тақдирда, тадқиқотлар бошланишидан олдин унинг ота-онасидан ёки бошқа қонуний вакилларидан ёзма равишда розилик олиниши керак.
Шунингдек:
- бир ишлаб чиқарувчининг турли савдо номлари остидаги, таркиби бир хил дори моддаларидан иборат бўлган дори воситаларини рўйхатдан ўтказишга йўл қўйилади;
- дори воситаларини, тиббий буюмларни ва тиббий техникани давлат рўйхатидан ўтказиш натижаларига кўра хорижий ишлаб чиқарувчиларга амал қилиш муддати 5 йил бўлган тегишли рўйхатдан ўтказилганлик гувоҳномаси берилади, маҳаллий ишлаб чиқарувчиларга эса муддатсиз берилади (илгари – 5 йилга).
Шунингдек, донор қони ва унинг таркибий қисмларидан фармацевтика маҳсулотларини ишлаб чиқаришга ихтисослаштирилган фармацевтика ташкилотларига донор қони ва унинг таркибий қисмларини хусусий тартибда тўплашни, тайёрлашни, қайта ишлашни ва сақлашни амалга оширишга рухсат берилмоқда.
Ҳужжат Қонун ҳужжатлари маълумотлари миллий базасида эълон қилинган ва 22.11.2023 йилдан кучга кирди.
Собир Нурбердиев.
