Вазирлар Маҳкамасининг 19.08.2023 йилдаги “Экологик аудит соҳасини тартибга солувчи айрим норматив-ҳуқуқий ҳужжатларни тасдиқлаш тўғрисида”ги 402-сон қарори қабул қилинди.
Ҳужжат билан:
- Экологик аудиторнинг малака сертификатини бериш бўйича давлат хизматларини кўрсатишнинг маъмурий регламенти;
- Экологик аудиторлик ташкилотлари реестрини юритиш тартиби тўғрисидаги низом тасдиқланмоқда.
Маълумот учун: экологик аудит − экологик аудит субъекти амалга оширадиган хўжалик ва бошқа фаолиятни техник жиҳатдан тартибга солиш соҳасидаги норматив ҳужжатлар ҳамда атроф-муҳитни муҳофаза қилиш ва табиий ресурслардан оқилона фойдаланиш соҳасидаги норматив-ҳуқуқий ҳужжатлар талабларига риоя этиш юзасидан экологик аудиторлик ташкилоти томонидан ўтказиладиган тизимли, ҳужжатлаштирилган, мустақил баҳолаш.
Сертификатни олиш учун малакавий имтиҳон экология вазирлиги ҳузуридаги комиссияга топширилади.
Номзодга талаблар:
- экология ва атроф-муҳитни муҳофаза қилиш соҳасига оид (биолог, геолог, гидролог-муҳандис, ер геодезия ва картографияси муҳандиси, шунингдек, сув, атмосфера, ер ва ер ости бойликлари муҳофазаси мутахассисликлари) олий маълумот;
- атроф-муҳитни муҳофаза қилиш соҳасида ёки турдош соҳаларда кетма-кет камида уч йиллик иш тажрибаси.
Сертификатни қўлга киритиш учун:
- номзод давлат хизматлари маркази ёки ЯИДХП орқали мурожаат этиб БҲМнинг 1 баравари миқдорида йиғим тўлайди;
- 10 кун ичида ваколатли орган номзодни имтиҳонга қўйиш ҳақида қарор қабул қилади ва 3 кун ичида унга хабар беради;
- имтиҳонга қўйилган номзодга имтиҳон куни ва вақти ҳақида 10 кун олдин хабар берилади;
- имтиҳон 50 та саволдан иборат тест шаклида компьютерда ўтказилади, саволлар мавзулари вазирлик сайтида эълон қилинади;
- тест жараёнлари видеотасвирга туширилади ва бир йил давомида комиссияда сақланади;
- ҳар бир тўғри жавоб учун 1 балл берилади, тестни муваффақиятли топшириш учун камида 40 балл тўплаш лозим.
Ҳужжат Қонун ҳужжатлари маълумотлари миллий базасида эълон қилинган ва 21.08.2023 йилдан кучга кирди.
Собир Нурбердиев
