Вазирлар Маҳкамасининг 04.04.2023 йилдаги “Давлат ёнғин назорати ҳамда санитария-эпидемиология соҳасида давлат хизматларини кўрсатишни янада такомиллаштиришнинг қўшимча чора-тадбирлари тўғрисида”ги 142-сон
қарори қабул қилинди.
Ҳужжат билан бино (иншоот) ва хонани ёнғин хавфсизлиги талабларига мувофиқлиги тўғрисида хулоса бериш бўйича давлат хизматини кўрсатиш маъмурий регламенти тасдиқланмоқда.
Хизмат кўрсатишнинг қуйидаги тартиби ўрнатилмоқда:
- аризачи давлат хизматлари марказига мурожаат қилади ёки ЯИДХП орқали сўровнома юборади ва БҲМнинг 10% миқдорида йиғим тўлайди;
- ФВВнинг ёнғин назорати органи 10 кун ичида жойига чиққан ҳолда бинони талабларга мувофиқлигини ўрганиб, хулоса ёки хулосани беришни рад этиш ҳақида хабарнома шакллантиради;
- QR-код акс эттирилган хулоса ёки хулоса беришни рад этиш ҳақида хабарнома тегишинча давлат хизматлари марказига ёки ЯИДХП орқали юборилади;
- давлат хизматлари маркази келиб тушган ҳужжатни аризачига электрон шаклда юбориб, уни хабардор этади.
Шунингдек ҳужжат билан радиотехника воситаларини ўрнатиш ва фойдаланиш учун санитар паспортни бериш давлат хизматини кўрсатишнинг маъмурий регламенти тасдиқланмоқда. Паспорт олиш тартиби юқоридаги тартиб каби бўлиб, йиғим миқдори БҲМнинг 2 бараварини, хизмат кўрсатиш муддати эса 14 кунни ташкил этади.
Ҳужжат Қонунчилик маълумотлари миллий базасида эълон қилинган ва 05.04.2023 йилдан кучга кирди.
Собир Нурбердиев.
