Ишламаяпсизми – имтиёзларни қайтаринг

Касб-ҳунар коллежлари битирувчилари коллежни тамомлагандан кейин бир йил мобайнида ЯТТ сифатида давлат рўйхатидан ўтган тақдирда уларга имтиёз тақдим этилади: давлат рўйхатидан ўтган санадан эътиборан қатъий белгиланган солиқни тўлашдан 6 ой муддатга озод этилади. Аммо давлат рўйхатидан ўтилган пайтдан бошлаб 12 ой ичида фаолиятини тугатса, фаолиятни амалга оширган барча давр учун, шу жумладан, имтиёзли 6 ой учун ҳам солиқ тўлаши зарур (СКнинг 375-моддаси).

Энди мазкур моддага киритилган қўшимчалар асосида ушбу норма битирувчи бўлган ЯТТнинг фаолияти уч ойдан кўп муддатга тўхтатиб турилганда ҳам қўлланилади.

Масалан, коллеж битирувчиси ЯТТ сифатида январь ойида рўйхатдан ўтди. Умумий қоидага кўра у январь ойидан июнь ойига қадар қатъий белгиланган солиқни тўлашдан озод этилади. Аммо агар у фаолиятини, масалан, сентябрь ойида тўрт ойга тўхтатиб турса, январдан августга қадар бўлган давр, яъни фаолият амалга оширилган бутун давр учун солиқни тўлаши керак.

Мазкур ҳужжатнинг тўлиқ матни билан, у билан боғланган бошқа қонун ҳужжатларига шарҳлар ва ҳаволалар билан «Ўзбекистон Республикаси қонунчилиги» ахборот-қидирув тизимида танишиш мумкин.

Музаффар Мирзағаниев,
экспертимиз.