Олий суд Пленуми – энди энг юқори инстанция эмас

Ҳужжат билан суд инстанциялари рўйхатига тузатиш киритилди.

Биринчидан, Олий суд Пленуми (судьяларнинг умумий йиғилиши) энди энг юқори суд инстанцияси ҳисобланмайди. Илгари у назорат тартибида аниқ суд ишларини кўриб чиқар эди (мансабдор судьялар ва прокурорлар протестлари бўйича). Энди у фақат ташкилий масалаларни ҳал этади, суд амалиётини умумлаштиради ва қонунчиликнинг қўлланилиш тартиби ҳақида тушунтиришлар беради.

Олий суд Раёсати энг юқори инстанция бўлди. У Раис, унинг биринчи ўринбосари, ўринбосарлари ва бир нечта судьялардан иборат.  Раёсатнинг аниқ таркибини Пленум тасдиқлайди.

Иккинчидан, ўрта бўғин судлари Раёсатлари (Қорақалпоғистон Республикаси, вилоятлар ва Тошкент шаҳри, Ҳарбий суд) ҳам аниқ суд ишларини кўриб чиқмайдиган бўлишди. Илгари улар Олий суд Пленуми сингари назорат қилувчи инстанция ҳисобланар эди. Энди улар фақат суд амалиётини умумлаштириш материалларини кўриб чиқиш ва судлов ҳайъатлари ҳамда қуйи судлар раислари маърузаларини эшитадиган бўлди.

Мазкур судлар раислари ҳамда Қорақалпоғистон Республикаси, вилоятлар ва Тошкент шаҳри прокурорлари, Ҳарбий ва Транспорт прокурорлари  энди назорат тартибида протест келтира олмайди.

Учинчидан, жиноят ишлари бўйича апелляция ва кассация судлари қарорларини қайта кўриб чиқиш тартиби ўзгарди.

Қорақалпоғистон Республикаси Олий суди, вилоятлар ва Тошкент шаҳри судлари, Ҳарбий суд аппеляция ва кассация ҳайъатларининг ажримлари фақат жиноят ишлари бўйича суд ҳайъати ҳамда Олий суднинг ҳарбий ҳайъати томонидан назорат тартибида кўриб чиқилиши мумкин.

Ўзбекистон Республикаси Олий суди апелляция ва кассация судлов ҳайъатларининг ажримлари ҳамда Ўзбекистон Республикаси Олий суди судлов ҳайъатларининг назорат тартибида чиқарилган ажримлари  – Олий суд Раёсати томонидан кўриб чиқилади.

Самир Латипов,
экспертимиз.