Президентнинг 18.11.2024 йилдаги ПҚ-396-сон қарори билан Андижон давлат техника институти ташкил этилмоқда.
Институт Андижон машинасозлик институти, Андижон иқтисодиёт ва қурилиш институти ҳамда Тошкент тўқимачилик ва енгил саноат институтининг Андижон факультети негизида ташкил этилади.
Институтнинг асосий вазифалари:
- автомобилсозлик, электротехника, энергетика, муҳандислик, қурилиш, тўқимачилик ва бошқа саноат тармоқлари бўйича замонавий билим ва кўникмаларга эга кадрлар, шунингдек ҳудуднинг олий маълумотли кадрларга бўлган эҳтиёжига мувофиқ мутахассислар тайёрлаш;
- халқаро эътироф этилган ташкилотларнинг амалдаги рейтингларида топ-300 га кирган хорижий олий таълим муассасалари тажрибаси асосида таълим жараёнида фан ва техниканинг сўнгги ютуқларини қўллаган ҳолда таълим дастурларини ишлаб чиқиш ва жорий этиш;
- амалий ва фундаментал илмий-тадқиқот ишлари ҳамда инновацион лойиҳаларни амалга ошириш самарадорлигини ошириш;
- ихтисослик йўналишлари бўйича таълим, фан ва ишлаб чиқаришни интеграция қилиш ва бошқалар.
2024/2025 ўқув йилидан бошлаб Институтга саноат ҳамкорлари сифатида йирик ишлаб чиқариш корхоналари бириктирилади.
2025/2026 ўқув йилидан бошлаб Институтда "энергетика муҳандислиги", "сунъий интеллект", "мехатроника ва робототехника" каби йўналишлар бўйича кадрлар тайёрлаш ҳажмини ошириш режалаштирилмоқда.
Бундан ташқари, халқаро стандартлар асосида талабаларнинг фанларни ўзлаштириш кўрсаткичлари ва Институт профессор-ўқитувчилари фаолияти самарадорлигини баҳолаш тизими жорий этилади.
Ҳужжат билан:
- Андижон давлат техника институти фаолиятини ташкил этиш ҳамда унинг моддий-техника базасини мустаҳкамлаш бўйича "Йўл харитаси";
- Андижон давлат техника институтига оператив бошқарув ҳуқуқи асосида бепул берилаётган объектлар рўйхати;
- Андижон давлат техника институтига бириктирилаётган ўрта махсус ва касбий таълим ташкилотлари рўйхати тасдиқланди.
Ҳужжат Қонун ҳужжатлари маълумотлари миллий базасида эълон қилинган ва 2024 йил 25 ноябрдан кучга кирди.
Лола Абдуазимова
