Вазирлар Маҳкамасининг 11.05.2022 йилдаги “Хусусий секторда ўсимликлар ҳимояси соҳасида хизмат кўрсатадиган юридик шахслар ходимларининг ва жисмоний шахсларнинг малакасини ошириш ҳамда уларга сертификат бериш тартиби тўғрисидаги низомни тасдиқлаш ҳақида”ги 251-сон қарори қабул қилинди.
Малака ошириш курслари шартнома асосида Ўсимликлар карантини ва ҳимояси агентлигининг Ўсимликлар карантини ва ҳимояси илмий-тадқиқот институтида белгиланган ўқув дастурига мувофиқ ташкил этилади. Уларнинг давомийлиги 72 соат бўлади. Курслар натижалари бўйича электрон шаклда сертификат расмийлаштирилади ва уч йил муддатга берилади.
Қарор билан қуйидагилар белгиланди:
- малака ошириш курслари ҳамда сертификат бериш мақсади ва вазифалари;
- курсларда ўқишга ҳужжат топшириш тартиби;
- малака ошириш курсларида таълим жараёни сифатига қўйиладиган асосий талаблар;
- малака ошириш курслари тингловчиларининг ҳуқуқ ва мажбуриятлари, уларни ўқишдан четлатиш асослари;
- ўқитиш якунида малака имтиҳонини ўтказиш ва унинг натижаларига кўра тингловчиларга сертификат бериш;
- ўсимликлар ҳимояси мутахассислиги бўйича сертификат берилган мутахассисларнинг давлат реестрини юритиш қоидалари.
Ҳужжат Қонун ҳужжатлари маълумотлари миллий базасида эълон қилинган ва 11.05.2022 йилдан кучга кирди.
Саодат Усманова.
