Вазирлар Маҳкамасининг 3.07.2015 йилдаги 180-сон қарори билан жиноий фаолиятдан олинган даромадларни легаллаштиришга ва терроризмни молиялаштиришга қарши курашиш бўйича миллий тизимининг такомиллаштирилиши муносабати билан Ҳукуматнинг айрим қарорларига ўзгартиришлар ва қўшимчалар киритилди.
Махсус ваколатли давлат органи билан биргаликда қуйидаги идоралар жиноий фаолиятдан олинган даромадларни легаллаштиришга ва терроризмни молиялаштиришга қарши курашиш бўйича ички назорат қоидаларини ишлаб чиқади ва тасдиқлайди:
-Молия вазирлиги – суғурталовчилар ва суғурта воситачилари, лизинг хизматлари кўрсатувчи ташкилотлар (банк ва бошқа кредит ташкилотлари бундан мустасно), лотерея ва таваккалчиликка асосланган бошқа ўйинлар ташкилотчилари ҳамда аудиторлик ташкилотлари учун;
- Давлат рақобат қўмитаси ҳузуридаги Қимматли қоғозлар бозорини мувофиқлаштириш ва ривожлантириш маркази – қимматли қоғозлар бозорининг профессионал иштирокчилари учун (банклар ва суғурталовчилар бундан мустасно);
- Хусусийлаштириш, монополиядан чиқариш ва рақобатни ривожлантириш давлат қўмитаси – биржалар аъзолари ва риэлторлик ташкилотлари учун.
Кўрсатилган вазирликлар ва идоралар қоидаларга риоя қилинишини мониторинг ва назорат қилиш ҳамда текширишни амалга оширади, қонун бузилишлари аниқланган тақдирда эса қонунчиликда ўрнатилган тартибда тегишли чоралар кўришга ҳақли бўлади.
«Ўзбекистон Республикаси қонунчилигида янги» шарҳини бизнинг эксперт-юристимиз
Елена ЕРМОХИНА тайёрлади.
