ЙҲҚни бузиш ҳолатлари бўйича телефон, видео- ва фотокамералар ёзувлари қабул қилинади

Вазирлар Маҳкамасининг 20.09.2018 йилдаги 747-сон қарорига ўзгартириш ва қўшимчалар киритилди (11.11.2020 йилдаги 713-сон ВМҚга қаранг).

Эслатиб ўтамиз, 2019 йил 1 июлдан ИИБ томонидан жисмоний ва юридик шахсларнинг автомобилларига ўрнатилган видеорегистраторлар орқали қайд этилган ЙҲҚни бузиш ҳолатлари тўғрисидаги видеоёзувларни қабул қилиш бошланган.

2021 йил 1 январдан бошлаб видеокузатув, тасвирга олиш техник воситалари ва мобиль қурилмалар орқали қайд этилган бундай ёзувларни юбориш мумкин. Бунда тартиб ўзгартирилмайди:

• видео марказлаштирилган тизим орқали (ejarima.uz) юборилади. Унда ҳуқуқбузарлик ҳолати, содир этилган санаси ва вақти, транспорт воситасининг маркаси ва давлат рақами аниқ кўринган бўлиши лозим;
• видеоёзувларни юборганларга мукофотлар БҲМнинг 5%и миқдорида ҳуқуқбузардан ундирилган жарима ҳисобидан тўланади;
• видеоёзувларни қабул қилиш ва кўриб чиқиш, улар учун ҳақ тўлаш жорий схема бўйича амалга оширилади (бу ерда қаранг);
• ҳуқуқбузарлик қайд этилган видеоёзувни тақдим этган шахс ҳақидаги маълумотлар ошкор этилмайди.

Бу – муҳим! Юқорида баён этилган тартиб МЖТКнинг 125–127, 128², 128³, 131, 135, 135¹, 136, 138–141, 176³ ва 194-моддаларида кўрсатилган ҳуқуқбузарликларга татбиқ этилмайди.

Ҳужжат Қонун ҳужжатлари маълумотлари миллий базасида эълон қилинган.

Олег Заманов.