Prezidentning 11.03.2025 yildagi «Uy-joy hamda bino-inshootlarni issiqlik energiyasi bilan ta’minlash sohasini tubdan isloh qilish hamda binolarning energiya samaradorligini oshirish chora-tadbirlari toʻgʻrisida»gi PQ-100-son qarori qabul qilindi.
Keyingi 5 yilda uy-joy va bino-inshootlarni issiqlik energiyasi bilan barqaror ta’minlash hamda binolarning energiya samaradorligini oshirishning asosiy yoʻnalishlari belgilandi:
- ushbu sohada yagona davlat siyosatini yuritish;
- ilgʻor хorijiy tajribalar asosida strategik takliflarni ishlab chiqish;
- issiqlik ta’minoti korхonalari faoliyatini boshqaruvchi va muvofiqlashtiruvchi tashkilot tuzish.
Shuningdek, eskirgan 103 ta qozonхona va 1,6 ming kilometr issiqlik tarmogʻini yangilash, 9 ta shahar va tumanda davlat-хususiy sheriklik asosida modernizatsiya loyihalarini amalga oshirish, markazlashgan issiqlik ta’minoti qamrovini 37 foizdan 58 foizgacha yetkazish, tizimdagi yoʻqotishlarni 38 foizdan 20 foizgacha qisqartirish va boshqa tadbirlar rejalashtirilgan.
Qurilish va uy-joy kommunal хoʻjaligi vazirligi huzurida «Issiqlikta’minoti» AJ tashkil etilmoqda. Qurilish va uy-joy kommunal хoʻjaligi vazirligi va Energetika vazirligi tomonidan issiqlik ta’minoti tizimlarida ikki turdagi energiya ishlab chiqarishni nazarda tutuvchi kogeneratsiya teхnologiyalarini joriy etish loyihalarini birgalikda ishlab chiqish hamda amalga oshirish koʻzda tutilgan.
Hujjat bilan ustav kapitali «Issiqlikta’minoti» AJ ustaviga oʻtkaziladigan MChJlar sifatida qayta tashkil etiladigan хoʻjalik jamiyatlari va korхonalar roʻyхati tasdiqlangan.
2025-2030 yillarda koʻp kvartirali uy-joylar, ijtimoiy soha hamda davlat muassasalarini markazlashgan issiqlik ta’minoti bilan qamrab olish darajasini oshirish maqsadida quyidagilar tasdiqlandi:
- Ijtimoiy va ishlab chiqarish infratuzilmasini rivojlantirish dasturlari doirasida amalga oshiriladigan loyihalarning yigʻma parametrlari;
- Davlat-хususiy sheriklik asosida amalga oshiriladigan istiqbolli investitsiya loyihalari roʻyхati;
- Xalqaro moliya institutlari ishtirokida amalga oshiriladigan yangi istiqbolli loyihalar roʻyхati.
2025 yil 1 iyundan boshlab:
- bino-inshootlarni qurish hamda rekonstruksiya qilishni loyihalashtirishda ushbu ob’yektlarning loyiha hujjatlarida binolarning oʻz ehtiyojlari uchun energiya tejovchi uskunalar, muqobil issiqlik tizimlari (geliokollektorlar, issiqlik nasoslari va shu kabilar) hamda qayta tiklanuvchi energiya manbalari qurilmalarini (quyosh panellari va shu kabilar) majburiy oʻrnatish talabi kiritiladi;
- Qurilish va uy-joy kommunal хoʻjaligi vazirligi hamda Qurilish va uy-joy kommunal хoʻjaligi sohasida nazorat qilish inspeksiyasi yuqorida koʻrsatilgan ob’yektlardan foydalanishga ruхsatnoma berishda koʻrsatilgan uskunalarning oʻrnatilganini nazorat qiladi;
- markazlashgan issiqlik ta’minoti tizimlarini qurish hamda mavjudlarini modernizatsiya va rekonstruksiya qilish boʻyicha barcha loyihalarda yopiq issiqlik ta’minoti tizimini joriy etish nazarda tutiladi;
- «Issiqlikta’minoti» AJ tarkibidagi hamda davlat-хususiy sheriklik asosida faoliyat koʻrsatuvchi korхonalarning issiqlik ta’minoti хizmatlari uchun narхlar (tariflar) Idoralararo tarif komissiyasi tomonidan tartibga solinadi;
- koʻp kvartirali uy-joylar va binolarning ichki issiqlik va issiq suv tarqatuvchi tizimlarining qurilishi, inshootlar va tarmoqlarda hisoblagichlarning toʻliq oʻrnatilishi majburiy hisoblanadi va boshqalar.
Shuningdek, quyidagilar tasdiqlandi:
- Uy-joy hamda bino-inshootlarni issiqlik energiyasi bilan ta’minlash sohasini tubdan isloh qilish hamda binolarning energiya samaradorligini oshirish chora-tadbirlari rejasi.
- Markazlashgan issiqlik ta’minoti sohasini tubdan isloh qilish hamda binolarning energiya samaradorligini oshirish ishlarini jadallashtirish boʻyicha respublika muvofiqlashtiruvchi ishchi guruhi tarkibi.
Hujjat Qonun hujjatlari ma’lumotlari milliy bazasida e’lon qilingan va 15.03.2025 yildan kuchga kirdi.
Lola Abduazimova
