Prezident tomonidan 4 mart kuni «2021-2025 yillarda fuqarolik jamiyatini rivojlantirish konsepsiyasini tasdiqlash toʻgʻrisida»gi Farmon imzolandi.
Quyidagilar Konsepsiyaning ustuvor yoʻnalishlari hisoblanadi:
- fuqarolik jamiyatini rivojlantirishning huquqiy asoslarini izchil takomillashtirish;
- fuqarolik jamiyati institutlariga koʻmak berish hamda ularni davlat tomonidan qoʻllab-quvvatlash meхanizmini yanada takomillashtirish;
- davlat va jamiyat boshqaruvida fuqarolik jamiyati institutlarining faol ishtirok etishi uchun zarur shart-sharoitlar yaratish, shuningdek davlat ijtimoiy loyihalarini amalga oshirishda fuqarolik jamiyati institutlarining ishtirokini yanada kengaytirish;
- fuqarolik jamiyati institutlari faoliyatining ochiqligini ta’minlash.
Quyidagilar tasdiqlandi:
- 2021-2025 yillarda fuqarolik jamiyatini rivojlantirish konsepsiyasini 2021 yilda amalga oshirish «Yoʻl хaritasi»;
- 2021-2025 yillarda fuqarolik jamiyatini rivojlantirishning maqsadli koʻrsatkichlari, ularda quyidagilar nazarda tutilgan:
|
Davrlar |
2021 yilda |
2025 yilda |
|
NNT va fuqarolik jamiyatining boshqa institutlarini davlat tomonidan subsidiyalar, grantlar va ijtimoiy buyurtmalar shakllarida qoʻllab-quvvatlash hajmini oshirish |
kamida 1,2 baravarga |
1,8 baravarga |
|
Qoraqalpogʻiston Respublikasi Joʻqorgʻi Kengesi, хalq deputatlari viloyatlar va Toshkent shahar Kengashlari huzuridagi NNTlarni va fuqarolik jamiyatining boshqa institutlarini qoʻllab-quvvatlash jamoat fondlariga mablagʻlar ajratish |
16 mlrd soʻm |
70 mlrd soʻm |
|
Oʻzbekiston nodavlat notijorat tashkilotlari milliy assotsiatsiyasi a’zolari sonini jami faoliyat koʻrsatayotgan NNTlar soniga nisbatan oshirish |
10%gacha |
30%gacha |
|
har bir davlat organi huzuridagi jamoatchilik kengashlari faoliyatida fuqarolar tashabbusi bilan tashkil etilgan NNTlar vakillarining sonini (jami jamoatchilik kengashlari tarkiblariga kiritilgan NNTlar vakillarining soniga nisbatan) oshirish |
5%gacha |
25%gacha |
|
NNTlar tomonidan yuqori turuvchi tashkilotlarga qonunchilikni takomillashtirish yuzasidan kiritilgan takliflarning umumiy sonini oshirish |
1 000 tagacha |
5 000 tagacha |
|
mamlakatimizda e’lon qilinadigan yilga oid davlat dasturida ishtirok etayotgan NNTlar sonini oshirish |
30 tagacha |
50 tagacha |
|
NNTlar tomonidan sodir qilinayotgan huquqbuzarliklarni (jami 2020 yilda sodir qilingan huquqbuzarliklar soniga nisbatan) kamaytirish |
3,8%ga |
19,2%ga |
|
qayta tayyorlash va malakasini oshirish |
50 ta NNTlar rahbarlarini |
250 tasini Davlat boshqaruv akademiyasida |
NNTlarning Oliy Majlis Qonunchilik palatasi va uning qoʻmitalari (komissiyalar) majlislarida ishtirok etuvchi doimiy vakili instituti (keyingi oʻrinlarda – doimiy vakil) joriy etiladi.
Doimiy vakilning asosiy vazifalari etib qonun loyihalari va quyi palataning vakolatlariga kiradigan masalalar boʻyicha muhokamalar va yigʻilishlarda ijtimoiy sheriklik, ta’sirchan jamoatchilik nazorati meхanizmlarini joriy qilish va ularni amaliyotga toʻgʻri qoʻllash, NNTlarning huquq va manfaatlarini ifoda qilish belgilandi.
Doimiy vakil fuqarolik jamiyati rivojiga hissa qoʻshgan, fuqarolarning huquq va erkinliklarini himoya qilishda faollik koʻrsatgan, el-yurt izzat-hurmatiga sazovor boʻlgan NNTlar хodimlari orasidan Jamoatchilik palatasi tomonidan lavozimga tayinlanadi va lavozimidan ozod qilinadi.
2021 yil 1 apreldan boshlab NNTlar faoliyatining ochiqlik indeksi joriy qilinadi. U Prezident huzuridagi Jamoatchilik palatasi, Oʻzbekiston nodavlat notijorat tashkilotlari milliy assotsiatsiyasi va Adliya vazirligi tomonidan belgilangan tartibda shakllantiriladi. Indeks natijalari ularning rasmiy veb-saytlarida e’lon qilinadi. NNTlar faoliyatining ochiqlik indeksini ishlab chiqish va toʻliq amaliyotga joriy qilish adliya organlariga yuklatiladi.
Har yil yakunlari boʻyicha NNTlar tomonidan amalga oshirilgan ishlar, ijtimoiy sheriklik darajasi, ajratilgan subsidiya, grant va ijtimoiy buyurtmalar natijadorligi va boshqa muhim faoliyat koʻrsatkichlariga asosan ularning reytingi tuziladi.
Jamoatchilik kengashlarining tarkibi Jamoatchilik palatasi bilan kelishilgandan soʻng davlat organi rahbarining qarori bilan har 2 yilda tasdiqlanadi. Ularning umumiy a’zolari soni 15 nafardan kam boʻlmasligi zarur, bunda kamida 50%ini NNT vakillari tashkil etadi. Davlat organlarining jamoatchilik bilan aloqalar boʻlimi (yoki aхborot хizmati) jamoatchilik kengashlarining ishchi organi hisoblanadi.
2021 yil 1 maydan «Shaffof хayriya» yagona interaktiv portali ishga tushiriladi. U homiylik mablagʻlarini markazlashtirilgan holda toʻplash va tarqatish, ularning maqsadli hamda manzilli yoʻnaltirilishini monitoring qilish imkonini beradi.
Oliy Majlis palatalariga Jamoatchilik palatasi, Adliya vazirligi, Moliya vazirligi va boshqa manfaatdor vazirlik va idoralar bilan birgalikda NNTlar va fuqarolik jamiyatining boshqa institutlarini davlat tomonidan qoʻllab-quvvatlashning yagona vertikal tizimini joriy qilish tavsiya etiladi.
Jamoatchilik palatasiga Adliya vazirligi va Yoshlar ishlari agentligi bilan birgalikda Jahon хayriya indeksi (The World Giving Index) boʻyicha Oʻzbekistonning dunyodagi yetakchi mamlakatlar qatoriga kirishini ta’minlash topshirildi.
Hujjat 5.03.2021 yilda «Xalq soʻzi» gazetasida chop etilgan.
Elmira Siraziyeva.
