Вазирлар Маҳкамасининг 18.03.2025 йилдаги «Ўзбекистон Республикаси Ҳукуматининг айрим қарорларига товар-моддий бойликларни ташиш ҳужжатларини расмийлаштириш тартибини янада такомиллаштиришга қаратилган ўзгартириш ва қўшимчалар киритиш тўғрисида»ги 168-сон қарори қабул қилинди.
Ўзаро ҳисоб-китоблар тизимида электрон шаклдаги ҳисобварақ-фактуралардан фойдаланиш тартиби тўғрисидаги низомга киритилаётган қўшимчага кўра, товар-моддий бойликлар юклаб жўнатиш билан бир вақтда реализация қилинганда, электрон ҳисобварақ-фактура электрон товар-транспорт юк хати билан бирлаштирилган ҳолда расмийлаштирилиши мумкин.
Ҳисобварақ-фактураларнинг шакллари ҳамда уларни тўлдириш, тақдим этиш ва қабул қилиш тартиби тўғрисидаги низомга ҳам худди шу мазмундаги қўшимча киритилмоқда.
Бирлаштирилган ҳужжат шакли билан шу ерда танишиш мумкин.
Бундан ташқари, Товар-транспорт юк хатларини электрон шаклда расмийлаштириш тартиби тўғрисидаги низом янги таҳрирда қабул қилинди. Унга кўра, расмийлаштириш қуйидаги тартибда амалга оширилади:
• юк жўнатувчи иштирокчилар, товарлар ва транспорт воситалари тўғрисидаги маълумотларни шакллантиради ва электрон тасдиқлангандан сўнг уларни роуминг операторига юборади;
• роуминг оператори товар-транспорт юк хатини реестрга киритгандан сўнг, унга ID ва QR-кодларни бириктиради ва юк хатини текширади, шундан сўнг уни иштирокчиларга юборади;
• юкни етказиб бериш учун масъул шахс тегишли маълумотларни текширади ва юкни қабул қилиш ва юкни олувчига етказиб бериш фактини электрон тарзда тасдиқлайди;
• юк қабул қилувчи маълумотларни текширади ва товар-транспорт юк хатини электрон тарзда тасдиқлайди.
Товар-транспорт юк хатининг тасдиқланган шакли билан шу ерда танишиш мумкин
Ҳужжат Қонун ҳужжатлари маълумотлари миллий базасида эълон қилинган ва 19.03.2025 йилдан кучга кирди.
Собир Нурбердиев
