Президентнинг 20.02.2025 йилдаги "Иккинчи жаҳон урушидаги ғалабанинг 80 йиллиги ҳамда Хотира ва қадрлаш кунига тайёргарлик кўриш ва уни муносиб нишонлаш тўғрисида"ги қарори қабул қилинди.
Иккинчи жаҳон урушида қозонилган Ғалабанинг 80 йиллигини ҳамда "Ватан равнақи, тинчлиги ва ҳимояси йўлидаги қаҳрамонлик унутилмайди" шиори остида Хотира ва қадрлаш кунини юқори савияда ўтказиш мақсадида ҳужжат билан қуйидагилар тасдиқланди:
• 9 май - Хотира ва қадрлаш кунига бағишланган тадбирларга тайёргарлик кўриш ва уларни ўтказиш дастури;
• Тадбирларга тайёргарлик кўриш ва уларни ўтказиш бўйича Ишчи гуруҳ таркиби.
Фахрийлар кўрсатган мардлик, жасорат ва мардликнинг аҳамиятини тарғиб этишга қаратилган маънавий-маърифий тадбирлар ташкил этилади. Шунингдек, ёлғиз ва кам таъминланган Иккинчи жаҳон уруши қатнашчиларининг яшаш жойларини таъмирлаш ва ободонлаштириш режалаштирилган.
Иккинчи жаҳон урушининг ҳар бир қатнашчиси ва уруш оқибатида ногирон бўлиб қолган шахслар, меҳнат фронти фахрийлари, мустақиллик йилларида хизмат бурчини бажариш чоғида ногирон бўлиб қолган ҳарбий хизматчилар ва ҳуқуқни муҳофаза қилиш органлари ходимлари, шунингдек, ҳалок бўлганларнинг оила аъзолари моддий ва маънавий қўллаб-қувватланади.
Иккинчи жаҳон уруши қатнашчилари ва ногиронларига, 1941-1945 йиллардаги уруш даврида меҳнат фронти қатнашчиларига мамлакат Президенти номидан бир марталик пул мукофоти ва юбилей медалларини топшириш тантанали вазиятда ўтказилади.
Шунингдек, Иккинчи жаҳон урушининг ҳар бир қатнашчиси ва уруш оқибатида ногирон бўлиб қолган шахсларни парваришлаш ва уларга доимий равишда тиббий ёрдам кўрсатиш бўйича патронаж хизмати ташкил этилади ҳамда уларга белгиланган тартибда шартнома асосида тиббиёт мутахассислари бириктирилади.
Бундан ташқари, Иккинчи жаҳон уруши қатнашчилари ва меҳнат фронти фахрийларига уларнинг хоҳишига кўра санаторийларга бир марталик бепул йўлланмалар беришни таъминлаш режалаштирилмоқда.
Ҳужжат "Халқ сўзи" газетасида эълон қилинган ва 20.02.2025 йилдан кучга кирди.
Лола Абдуазимова
