Адлия вазирининг 07.02.2025 йилдаги 3605-сон буйруғи билан Норматив-ҳуқуқий ҳужжатлар ижросини мониторингдан ўтказиш тартиби тўғрисидаги низоми тасдиқланди.
Ҳужжат Президентнинг 16.08.2024 йилдаги "Ижтимоий муносабатларни ҳуқуқий тартибга солишнинг барқарорлигини таъминлаш, сифати ва самарадорлигини ошириш чора-тадбирлари тўғрисида"ги ПФ-111-сон Фармонига мувофиқ ишлаб чиқилган.
Норматив-ҳуқуқий ҳужжатнинг амалга оширилиши ва натижалари устидан мунтазам ва тизимли назорат мониторинг режаси асосида амалга оширилади. У НҲҲни қабул қилиш мақсадларини, кўрсаткичларни, мониторинг ўтказиш даврийлигини ва уни ўтказиш билан боғлиқ бошқа талабларни белгилайди.
Тадбиркорлик фаолиятига, фуқароларнинг ҳуқуқлари, эркинликлари ва қонуний манфаатларига, шунингдек атроф-муҳитга тааллуқли НҲҲларнинг ижроси беш йил давомида, қонуности ҳужжатларининг ижроси эса – улар кучга кирган кундан бошлаб уч йил давомида ҳар йили мажбурий назорат қилиниши лозим.
Мониторинг норматив-ҳуқуқий ҳужжат билан белгиланган давлат органи томонидан, масъул орган белгиланмаган ҳолларда эса – тегишли соҳада давлат сиёсатини амалга оширувчи вазирликлар ва идоралар томонидан амалга оширилади.
У 15.03.2021 йилдаги ПҚ-5025-сон қарори билан тасдиқланган лойиҳалар ва қабул қилинган НҲҲларнинг тартибга солиш таъсирини баҳолаш тартибига мувофиқ ўтказилади. Мониторингнинг асосий вазифалари:
- норматив-ҳуқуқий ҳужжатни қабул қилиш мақсадларига эришишни таъминлаш;
- унинг амалга оширилиши ва натижаларини таҳлил қилиш, мунтазам ва тизимли назорат қилиш;
- НҲҲнинг таъсирини баҳолаш учун статистик маълумотларни тўплаш;
- НҲҲни амалга оширишни қийинлаштирувчи ҳолатларни аниқлаш;
- ҳужжатни амалга ошириш амалиётининг уни қабул қилиш мақсадларига мувофиқлигини ўрганиш.
Ҳужжат Қонун ҳужжатлари маълумотлари миллий базасида эълон қилинган ва 10.02.2025 йилдан кучга кирди.
Лола Абдуазимова
