Вазирлар Маҳкамасининг 24.12.2024 йилдаги 880-сон қарори билан Тошкент шаҳрининг 2045 йилгача бўлган даврга мўлжалланган бош режаси тасдиқланди.
Президентнинг 11.09.2023 йилдаги ПҚ-299-сон қарорига мувофиқ бош режа Қурилиш ва уй-жой коммунал хўжалиги вазирлигининг лойиҳалаш топшириғига биноан соддалаштирилган шаклда ишлаб чиқилган.
Бош режада қуйидаги вазифаларни ҳал этишга алоҳида эътибор қаратилган:
- Тошкент ҳудудларини консервация зоналари ҳамда реконструкция ва реновация зоналарига ажратиш;
- аҳолининг ҳаракатланиш эҳтиёжларини қондириш ва транспорт оқимининг барқарорлигини таъминлаш;
- шаҳар ҳудудлари зичлиги параметрларининг барқарорлигини таъминлаш учун шаҳарсозлик талабларини белгилаш.
Бош режани ишлаб чиқишнинг асосий мақсадлари:
- қурилишга рухсат бериш жараёнларини тартибга солиш;
- шаҳарнинг муҳандислик ва транспорт инфратузилмасини, аҳоли зичлиги параметрларини, шунингдек умумий стратегиясини режалаштириш;
- шаҳарнинг яшил ва санитар ҳимояланадиган ҳудудлари ҳамда маданий меросини муҳофаза қилиш;
- иқтисодий ва ижтимоий ривожланиш йўналишларини белгилаш, аҳолининг бугунги ва истиқболдаги эҳтиёжларини қаноатлантириш.
Бош режа асосий кўрсаткичларни ўз ичига олади, бунда уларни белгиловчи хариталар Қурилиш ва уй-жой коммунал хўжалиги вазирлигининг шаҳарсозлик кадастрида очиқ маълумотлар сифатида жойлаштирилади.
Ҳар чорак якуни бўйича Вазирлар Маҳкамаси мажлисида Тошкент шаҳар ҳокимининг бош режани амалга ошириш якунлари тўғрисидаги ҳисоботи эшитилади.
Ҳужжат Қонун ҳужжатлари маълумотлари миллий базасида эълон қилинган ва 25.12.2024 йилдан кучга кирди.
Лола Абдуазимова
